საჭრეთელი და სკალპელი... თითქოს ცა და დედამიწა.
ამ ორი იარაღის სინთეზს ის ხალხი თუ მოიფიქრებდა (და შეძლებდა), ვისაც სისასტიკის და სინატიფის ასეთი გამაოგნებელი ერთიანობა ახასიათებს (ქართულში ეს ყველაფერი ს-ზე რომ იწყება, დიდი შეღავათი არ უნდა იყოს)...
კირიდაში იაპონური სამუშაო დანაა — საჭრეთლის მსგავსი წახნაგებით, ბასრი პირით და წვეტით. მოკლედ, დავინტერესდი.
მასალად მქონდა 1095, მაღალნახშირბადოვანი ფოლადი. არა უჟანგავი, თუმცა უხეშ რამეებზე სამუშაოდ კარგად გამოსადეგი.
ბურღვა, ხეხვა, ქლიბვა და მერე ≈55°-მდე გამთბარ ზეთში წრთობა. მერე გამაგრება (? hardening) ≈180°-ზე რამდენიმე საათით, ცოტა კიდევ ხეხვა და შემდეგ უკვე ადრესატის ინიციალის და სხვა სიმბოლოების გრავირება (12v და მარილ-წყალი).
ტარის მხარეს წიფლის წახნაგოვანი ნაჭრებია დახრახნილი და ცვილით დამუშავებული. გამოყენების სავარაუდო სფერო მერყეობს სამზარეულოს უხეში საქმეებიდან სხვადასხვა ტექნიკურ სფეროებამდე.